(كان ياما كان )*** بقلم الشاعر ... أحمد هلال

كان ياما كان
ـــــــــــــــــــ
أول ما نبدى الكلام نسمّى بالرحمن
ونصلّى ع المصطفى محمد العدنان
ونقول كلام مختصر م القلب والوجدان
يهز قلب الحجر ويشيّب الولدان
وبصـوت حكيم قوّال .. وبريشة الفنان
ح نبدأ الملحمة .. ونقـول بصــوت رنان
ياسادة .. كان ياما كان
ـــــــ * ـــــــ * ـــــــ * ـــــــ
قبل التاريخ بتاريخ .. قبل الزمان بزمان
وقبل ما يفكروا .. إيه قيمة الانسان ؟
أيام ما كـانوا البشــر تايـهين بلا عنوان
بلدنا كانت أميرة ... وليها مـجـد وشـان
ونيلها ساحـر بيرسـم من كل لون بستان
والدنيا كانت سفينة والمصرى كان ربّان
ما تصلّوا ع المصطفى
ح نقـول كمـان وكـمـان
ياسادة .. كان ياما كان
ـــــــ * ـــــــ * ـــــــ * ـــــــ
نرجع نعيد الكلام ونصحصح الغفلان
ونفكر اللى نسى وساب الوطن يتهان
على أرضها الطيبة .. اتزلزل الطغيان
بلد الايمان والهدى ... وقـبلة الأديان
يوسف نبينا بدر مع قمحها الإيمان
وموسى شق الحجر وكلم الرحمن
وعيسى زرع القلوب بالحب والغفران
وصانا سيدنا النبى على خيرة الفرسان
رب العباد عَزّها .. كرمها فى القرآن
وفى كل شارع أو زقاق تسمع جرس وآدان
صلوا على سيدنا النبى
و وحــــــــــدوا الـديـان
ياسادة .. كان ياما كان
ـــــــ * ـــــــ * ـــــــ * ـــــــ
ونكمـل الملحمة .. مع درة الأوطـان
اللى حروف اسمها .. بتهز أى كيان
تكتب تاريخ العرب وتجمـع الخلان
وتسـد باب الفتن .. وتواجـه العدوان
يا مصر إسمك عظيم يا هدية م المنان
نيلك ده سر الحياة .. وبلسم العيّان
يامصرى حافظ عليها وشيلها فى الشريان
وكفاية كنا وكانت وكفاية كان ياما كان
انهض وحقق مناها .. وعلّى فى البنيان
رجعها تانى لمكانها فوق عرش كل زمان
الخلاصة :
ــــــــــــــ
بلدنا تستاهل كتير
نعدى عشانها ميت حاجز
قصاد تاريخها وشعبها
يقف قلم التاريخ
عـــــــــاجـــــــــز
ــــــــــــــــــــــــــــــــ

بقلم
**** أحمد هلال ****