مفكرتـــي
6 أغسطس، 201 ( توهان )
م الثانويه للكليه دي أغنيه قالوها زمان
.
وانا دلوقتي بقول من حيرتي م الثانويه للتوهان
لو جايب 90 في الميه دور يابني في كل مكان
وابقي قابلني لما تقابل جامعه تحترم الإنسان
وان نلاقيتها تاخد شهادتها وتعلقها في اي مكان
أو ترميها في درج المكتب وتجري تفتحلك دكان
وابو عشرين هتبيعه بعشره .وصدقني انت الكسبان
يجي زبون هيجر التاني وتصبح راجل من الأعيان
وانت ماشي هتلاقي راجل قاعد وطالب احسان
بص اتأكد كده في ملامحه أيوه هو عزيز سلطان
عزيز دا كان صاحب صاحبه والأول عالدفعه زمان
مالك يابني وايه اللي جرالك وايه اللي خلي عزك هان
لما طلعت الأول قالوا انت أكيد وايانا معيد
محجوزلك في الجامعه مكان
من يومها مجمع اوراقي ولا ممهم في دوسيه مليان
ماشي ادور علي كليه اومعهد يقبل اذهان
وابو مقبول ابن الدكتور لاقاله في الجامعه مكان
بص يا صاحبي لسه بدري لما يكون لي في بلدي مكان
أنا قررت اهاجر دوله تحترم عقل الانسان
يقعد جنب دوسيه اوراقي وأغني توهان توهان
بقلم سلوي نصر الدين
ليست هناك تعليقات:
إرسال تعليق