سهران***بقلم ...احمد صبري

سهران
احمد صبري

وانا سهران كالعادة
معايا القهوة بزيادة

بفكر ف اللي راح والجاي
بفكر اعمل ايه وازاي
بدور وسط اوراقي
بدور فـ الدولاب ع الناي

برسم بالكلام اشعار
وبتخيل ضفايرها
محتاجها تطفي النار
وبتمنى اسايرها

وضحكتها تريحني
ودمعتها بتدبحني
ولمستها بتمنحني
عودة للحياه تاني
ونظرتها بتسرقني
وبرائتها تطمعني
وجرائتها تشجعني
اعشقها بكل وجداني

انا بهواها من يومي
وبستناها تلاقيني
يعطر حضنها هدومي
في ليل البرد تدفيني

وبتلومني على بعدي
على سهدي سنين
وبتقولي نسيت وعدي
مين راح ينسى مين

انا انساكي انا اقدر
اخونك لحظة او افكر
ابيعك وانتي دنيايا
وجنة بيها بتصبر
ندى حبي وايامي
إزاي انساكي ياغرامي
انتي فـ قلبي ومعايا
اميرة قصر احلامي

انا سهران بستنى
ليلة تيجي تجمعنا
اشوفك بيكي اتهنى
اشرب منك سعادة
اعطش تاني ترويني
شهد عشقك يكفيني
حكاية عشق سنيني
في كل ليلة متعادة

وانا سهران كالعادة
معايا القهوة بزيادة