؛؛؛ "روح الفِـــــــــــــــدا " ؛؛؛
_____________________
_____________________
جالى شايل سلاحه
والعزم جوًه عينه
بصوته تنطق جراحه
والقوة مليا ايديه
وطى عليًا وباسني
وطبطب على ايدي
وقال لى ياما ادعيلي
رايح انا لعيدي
خاين جبان ملعون
دَنَس تراب وطني
وبايدي دي هيكون
منه شفا وطني
وان مُت ياما شهيد
وبقيت كما اخواتي
اوعي ف يوم العيد
تطفي لي شمعاتي
اوعي تقولي آه
الغيبة وجعاني
الفُرْقَة يااااالله
حرقالي اجفاني
واجعلي عوضك حفيدك
هيكون لك ياما رفيقك
واتكملي معاه
رديت عليه وكلامه
من جوًه يزلزلني
والدمعة مليا العين
ونبضي بيهجرني
من غير مااحس لقيتني
باخده قوي ف حضني
وبقول بصوت مبحوح :
ابني ياروح الروح
عَزْمَك بيسعدني
وغيرتك تفرحني
وحبك لبلدي ياغالي
بالعِزًة يرفعني
ياغنوتي ومالي
وسكني وترحالي
فراقك يملاني جروح
ويقطع خيوط العيش
لكن لبلدي روح
لغيرها مابنعيش
وافرح بنصر الله
من فضله هيزيدك
ربي عزيز ف علاه
وايده فوق ايدك
وَعَد ووعده حق
بنصره للمؤمن
وكل مؤمن حق
بالحق قوي مؤمن
هترجع يانور العين
رافع قوي راسي
والورد ع الخدين
يحضن لي انفاسي
راجع ياكل الناس
والراية ليك مرفوعة
ونعيش سوى الاحساس
والغنوة مسموعة
وكل خاين داس
على ارضنا الطاهرة
بالكَف ويًا الفاس
هنعمله عِبْرَة
رِكِبْ رِكابه وقال:
راجع هنا تاني
ومعايا كام موال
والفرحة كاسياني
مِشِي وقلبي معاه
راكب هناك جنبه
وعنيًا ماشيه معاه
تطلب له عون ربه
يااااااارب ياااااالله
وحياة حبيب الله
يارب قويهم
على عدو الله
يارب واحميهم
حقق له كل مناه
وافرح انا بيهم
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
عبيـــر الجنـــــــدي
همسـღـات اســــتثنائــღــة
ليست هناك تعليقات:
إرسال تعليق