النقش بالكلمات................ديوان اخر ورقة ..رشاد الدهشورى
عايش انا وسط الزحام
لو قالوا يوم شدوا الحزام
اضحك وارفرف كاليمام
مع انى ماعنيش حزام
قلمى اليتيم هو الرفيق
معاه احس انى فى سلام
وحسب ظروفى اخبى خوفى
وابيع كلام
مين يشترى حلاوة لسانى
من غير فلوس
شرط اللى اقوله يقوله تانى
هقول كلامى وابعت سلامى
لعم بيرم وصلاح جاهين
ولعمى نجم كل احترامى
هكتب قصايد مصرى وسعودى
فرعونى مصرى عاشق جدودى
شاعر وشاعر بكتير مشاعر
وحشونى دنقل والابنودى
يا شيخ مساعد مالك مكشر
قايم وقاعد عمال تفكر
شمر دراعك دى الارض فايره
وعدانها خضرا محتاجه تكبر
حالك يا خالى شاغللى بالى
مالك كده هيمان وشارد
تكنشى ناوى تكتب قصايد
النيل حبيبنا نرضى بنصيبنا
الارض تحبل والخير يواعد
الشمس حاميه والقمح رميه
نمسح عرقنا والرزق زايد
الارض تحبل بس بعرقنا
مسيرها تولد عايزه السواعد
شمر دراعك الخير يجيلك
عا الكل فارد
القطن زهر يا قوت ومرمر
خير بدرى بدرى
الرز حابل يطرح سنابل
ويجيلى دغرى
باميه وكوسه عايزه لها بوسه
والبت نوسه تملالى حجرى
يا فول يا صويا رزقك يا اخويا
شوف العروسة جوزنى بدرى
يا فول حراتى سكر نباتى
كبر بناتى واعدل لى ضهرى
قمح وشعير هيص ياطير
يا فرن ولع طلع فطير
ان الاوان يا برتقان
تملا الجناين تطرح عصير
تطرح قلوب تكبر تدوب
وتجيب حرير
واليوستفندى يكبر يا افندى
يملا البيوت فرح وسرور
يا شيخ مساعد قصبك مواعد
سكر قوالب وعسل يسيل
يا شيخ مجاهد عرقك دليلك
رزقك دراعك وبمستطاعك
الرزق يكتر
مصر السماره ام الحضاره
بجهود ولادها يخضر عودها
توفى بوعودها وتزيداثاره
مصر الامان
حرس الكنيسة صوت الادان
فى الفجر تسمع تواشيح زمان
تجلى الودان زى الكمان
اقول كمان
عايش انا وسط الزجام
زى الهداهد واليمام
اخبى خوفى وابيع كلام
وكمان اغانى
من غير فلوس
شرط اللى اقوله
تقولة تانى
رشاد الدهشورى
ليست هناك تعليقات:
إرسال تعليق